HORSE RACE & WHISKEY

මට බොක්කෙ එල යාලුවෝ ටිකක් හිටියේය.උන්ගේ අයියල සමහරක් පිටරට නැව්වල,හෝටල් වල,ලංකාවෙ ආයතන වල රැකියාවල ය.එක බොක්කෙක්ගේ ලොකු අයිය සුමතිපාල මුදලාලිගේ රේස් අංශයේ ප්‍රධානියෙකි.රැජිණිගේ රටේ ඒ කිව්වෙ එංගලන්තෙ රේස් සීසන් එකක් තියෙනවාලුය.එහෙම කාලෙට රේස් පත්තරෙන් ඔට්ටු කොරවන තුප්පහි රටවල මුදලාලිලා එහෙට යන්න ඕනලු සල්ලි ගෝනියකුත් අරන්.

මුදලාලිලාට දන්නේ හුද්ද හින්ගලම නිසා නියෝජිතයන් යවනවාය.මැනේජර්ලා යැව්වම සට සට ගා කඩ්ඩ වනන නිසා වෙන්ඩ ඇතිය.

එහෙම යවන්නේ වෙන මොකොටවත් නෙමේය.ඇස් පනාපිට දුවන අස්පයන්ට ඔට්ටු අල්ලන්නය.පැරදීගෙන යද්දී වච්චිල් නම් වානා ලුය.ගෙනිච්ච සල්ලි පිච්චියට ඉවර වෙනකම්ම කිරිඩාවේ නිරත විය යුතුලුය.

ඒ අයිය එහෙම ගිහිල්ල එනවිට විස්කි ගේන්නේය.ගෙනාපු විස්කි ඌ බොන පාටක් නොතිබුනේය.උස කැබිනෙට්ටුවේ දිලිසි දිලිසි පොදර්සනෙට තබනවාය.සමහර සෙනසුරාද හවසට උන්ගේ ගෙදර සෙට් වෙන්නෙ 7years old /ඩබල් ඩිස්ටිල්/VSOA හරි ඕල්ඩ් අරක්කු බෝතල් කීපයක් එක්කය.බයිටට රතු ලුණු මිශ්‍ර උම්බලකඩ සම්බලය,සැමන් සම්බලය,හරක්මස් බැදුම,වල් ඌරුමස් බොරට උයපුව ඔය මොනවා හරි ජාති දෙකක් විතර පටන් ගැන්මේදී තියෙනවය.රෑ වෙද්දී පොලෝසියේ යාලුවෝ දෙතුන් දෙනෙකුත් සෙට් වෙන්නෙ තැටි පාන් හරි රෝස් පානුත් එක්කය.ගෙනාපු අරක්කු අහවර වුනාම කැබිනෙට්ටුවේ තියෙන විස්කි එකක් දෙකක් ගන්නවාය.හැබැයි නැවත දවල්ට ගෙනත් තබන්න වෙන්නෙ මටය.

ඒ කාලේ කොල්ලුපිටියේ ඩියුටි ෆ්‍රී එක තිබුන නිසා,ඉට්ටේසම ලග තිබ්බ පෙට්ටි කඩේක විස්කි හොරෙන් වික්කේය.ගෝල්පේස් වල එන්ජෝයි කරද්දී රෑ දෙකටත් ඇහැරවල විස්කි ගත්ත අවස්ථාත් තිබුණාය.

ඔය දඩ මස් දෙල්කද පොලට ගෙනාවේ පියදාස විජේකෝන් කියන නළුවය.ගෝලයෙක් එක්ක එයාම එලවාගෙන සුදු වෑන් එහෙක ගේන්නෙ පෝමිට් තියෙනවා වගේය.ආරංචිය තිබුනේ නම් ඇඹිලිපිටිය,උඩවලව පැත්තෙන් ගේනවා කියලය.

යාලුවාගේ අයිය රෑට ගෙදර නැත්තේ රාජකාරිය.උදේ පාන්දර කුණු කෙල පිටින් දුවගෙන එන අන්තුවන්ට රිසාල්ට් පත්තරේ පාන්දර 4 වද්දී අතට පත් කොරන්න ඕන නිසා ඒ වැඩ කොරෝනවාය.

කොලේ අතට ගන්න අන්තුවන්ගේ පෙරදා සිහින බොද වී යද්දී ඒ මුහුණවල් නම් බලන්න අප්‍රසන්නය.මගේ අඩවන් වූ ඇස් වලටම දැක තිබෙනවාය.අඩවන් වූ කිව්වෙ,අපේ සෙට් එක එම එවෙලාවෙත් බොන ගමන්ය.

හවසට යාලුවාගේ ගෙදර සෙට් වුනාම අර අයියගේ මල්ලිත් එක්ක එයාලගේ රේස් පොට් එකට, ඉතුරු අඩුම කුඩුමත් දාගෙන අපිත් යනවාය.පොට් එක ඇවිල්ල කොච්චිකඩේ පල්ලිය ඉස්සරහ මල් කඩ පේළියක තිබුනේය.මේවා හැමදාම වෙන්නේ නැතත් ඉද හිට වූ ආතල් ක්‍රියා දාමයන්ය.

චිට් වැඩ කොරල තියෙන අන්තුවො නම් යාලුව ගේ ලියන්නලට තුණ්ඩුව පෙන්නලා සුළු ගානක් කපන් යන්නේ ලගම පොට් එකටය.ඒ වෙන මොකටවත් නොවේය.පාන්දර කාලකින් බොකු බඩවැල් පොගවා දෑත සක්තිමත් නොකොළොත් දෑත වෙවුලන බැවින්ය.

පැරදුන උන්ට සලකන්න එක ඩොගි යෙක්වත් නැතිය.උන් ලහි ලහිහේ දුවන්නේ පිටෝටුව පැත්තටය.මාළු/තොග/මැනිං මාකෙට්ටු වල උන්ගේ "කර" සල්ලි කරන්නය.මම නම් ඒ අහින්සක යං එකෙකුට දෙන්නකුට සොට් එකක් දීල,කැහි කොටයක් දුන්නම හැම දෙයක්ම වමාරනවය.සමහරු එහෙම දෙද්දී බොරු බේගල් ඇදල ගාන කපන්නත් හදනවය.

ලියන්නා තුන්ඩුවේම දුන්න ගාන මාක් කොරල මුදල දෙන්නේය.මිනිස්සුන්ට කියන්නේ බැංකුවෙන් සල්ලි ගෙනත් දෙන බවය.ඒ හෙන ගහන පට්ට බොරුය.දවල් 10 වෙද්දී හොද ගානක් එකතු වෙලාය.ගෙවන්නේ එකතු වෙන මුදලින් තමාය.

හැබැයි ඉතින් කලාතුරකින් බැංකුවෙන් අදින්න වෙන දවසුත් තියෙනවාලුය.ඒ හිතපු නැති අස්පයෝ win කොලාමලුය.සමහරු අස්පයාගේ ඔලුවටම ගහනවලු.පොල්ලකින් නෙමේය.සුපියල් වලින් තනි අස්පයට ඔට්ටු අල්ලද්දී කියන්නේ එහෙමලුය.සමහරු ඩබල්,ට්‍රිබල් කියල d .t .w /o කියලත් සුපියල් දානවාලුය.මට නම් අන්ඩර දෙමළය.

අපේ ජෝති අයිය තනි අස්පයට 500 හරි 1'000 හරි ඔලුවටම ගහල මරිය කඩේ බුකියට චිට් එක යවන්නෙ එයා ලග උදව්වට හිටපු කළු අයියා අතය.ඒ දෙන්නම් කාසි වලටය.එහෙම යවල එයා චිත්තර පටියක සිංදු රෙකෝඩිමකට චිත්‍රාගාරයකට යනවාය.ඒවා අහවර වෙලා පාන්දර එනගමන් රිසාල්ට් කොළෙත් අරං පෙරදා දෙන්නම් කාසිත් ගෙවල ප්ලැට් එකට යනවාය.සරමට බැහැල කළු අයිය ඔතල තියෙන සුස්තියත් උර උර කොලේ බලන්නේ බොග දමන ගමන් ලැට් එක තුලය.

රේස් බය් කියල පස්සේ ආපු කාලෙක කොටුවෙ මිලර්ස් බිල්ඩිමේ උඩ තට්ටුවේ නුවර තදයෙක්ගේ එහෙම එකක් තිබ්බේය.ඇතුල් වෙද්දී ලොකු මුදලක් පෙන්නුවාම විස්කි බොන්ඩත් දුන්නාය.යාලුවාගේ ආරාධනාව මත බලන්න ඕන නිසා මමත් එක වරක් ගියාය. මට නම් ඕවා අරහන්ය.මිත්තර කමට ආශ්‍රය කළා පමණය.ලගදි ආව තුන් දෙනා එහෙම සම්බන්ධ උන්ය.රේස් නෙමේ වෙන්න ඇතිය.මම ඕවා අහන්න යන්නෙත් නැතිය.